По завршувањето на сингл мечевите, вториот патник во финалето на Дејвис купот во Малага меѓу тениските репрезентации на Србија и Италија одлучуваше дуелот во двојки.

Во решавачката пресметка победата за Италија ја обезбедија Јаник Синер и Лоренцо Сонего кои со 2:0 во сетови 6:3 и 6:4 ги совладаа Новак Ѓоковиќ и Миомир Кецмановиќ.

Противник на Италијанците во финалето ќе биде селекцијата на Австралија која претходно ја елиминираше Финска.

И минатата година Австралијците играа во финалето, но тогаш загубија од Канада. Последен пат Австралија го освои натпреварувањето во 2003 година кога со 3:1 триумфираше над Шпанија.

Од друга страна Италија само еднаш го има освоено Дејвис купот, во далечната 1976 година во Сантјаго со 4:1 беше подобра од Чиле. Последен пат Италијанците беа финалисти во 1998 година кога загубија од Шведска (4:1) во Милано.