Има втор најголем пораст на ковид заболени во Европа по Шпанија: Чешка од понеделник под вонредна состојба
Чешката Влада донесе одлука за прогласување на вонредна состојба што ќе стапи во сила од понеделник и воведе мерки што вклучуваат ограничување на собири и забрана за музички настани во борбата против новиот бран на коронавирусот.
Државата со популација од 10,7 милиони жители, овој месец забележа над 43.000 заразени случаи со ковид-19 и пораст на бројот на починати за 50 отсто, што претставува втор најголем европски пораст на инфицирани по Шпанија. Затоа министер за здравство, Роман Примула најави заострување на мерките што ќе траат две недели.
Во земјата ќе бидат ограничени собирите во затворено до 10 луѓе, а на отворено максимум 20. Спортските натпревари ќе продолжат, но без публика.
Средните училишта во покраините со поголем ризик од понеделник ќе почнат со настава од далечина, а ќе им се придружат и универзитетите.