Хрватска денеска против Холандија за финале во Лигата на нации
Репрезентацијата на Хрватска денеска од 20.45 часот ќе го игра полуфиналниот натпревар против Холандија. Овој меч е во рамките од завршниот турнир од Лигата „А“ во Лигата на нации кој ќе се одржи во Ротердам.
Другата полуфинална двојка ја сочинуваат Шпанија и Италија, а овој дуел е закажан за в четврток, исто така од 20.45 часот, а финалето и мечот за третото место ќе се одиграат в недела.
– Холандија е голем противник кој беше на врвот на светскиот фудбал и повторно се враќа на тие позиции. Тие играат пред својата публика и ќе биде тешко, но јас сум оптимист со оглед на нашата желба. Сакаме да уживаме во завршниот турнир, а резултатот е веќе одличен со пласманот меѓу најдобрите четири репрезентации. Ќе се обидеме да дојдеме до медал – рече хрватскиот селектор, Златко Далиќ.
Капитенот на „коцкестите“, Лука Модриќ вели дека репрезентацијата е полна со ентузијазам, волја и енергија.
– Играме против добра, млада, талентирана селекција, која се враќа на старите патеки на славата, тие се квалитетна генерација, ќе ни биде тешко пред нивните навивачи, но ќе има и наши навивачи, па тоа ќе биде поттик за нас. Според мене шансите се 50-50, наше е повторно да го дадеме својот максимум. Полни сме со ентузијазам, волја и енергија, работевме феноменално и се чувствуваме добро, иако ни претстои тежок натпревар против феноменален тим полн со врвни играчи кои се иднината на европскиот и светскиот фудбал – се зборовите на Модриќ.
🇭🇷🇮🇹🇳🇱🇪🇸 Who's winning it?#NationsLeague pic.twitter.com/74i2EAwgW5
— UEFA EURO 2024 (@EURO2024) June 12, 2023