Јужнокорејскиот производител на автомобили Хјундаи ќе се приклучи на егзодусот на мултинационалните компании од Русија со продажба на своето локално производство по номинална цена. Одборот на директори ги одобри плановите за продажба на акции од Хјундаи Рус на Арт-Фајненс за 10.000 рубли (100 евра), објави денеска компанијата.

„Хјундаи преговара со Арт-Фајненс за деталите од договорот. Со цел да ги поддржи сопствениците на возилата Hyundai во Русија, Хјундаи ќе продолжи да обезбедува услуги за клиентите по продажбата”, изјави портпаролката на компанијата.

Арт-Фајненс е филијала на рускиот дилер на автомобили Авилон.

Склопните линии во главната фабрика на ХММР во Санкт Петербург, отворена во 2010 година, не работат од март 2022 година, веднаш по почетокот на руско-украинската војна, како резултат на тесните грла во снабдувањето со делови.

Хјундаи претходно произведуваше околу 200.000 автомобили годишно во таа фабрика, објавија јужнокорејските медиуми. Во март оваа година, Хјундаи објави дека сè уште истражува различни опции во врска со своето работење во Русија.

Според берзата на Хјундаи, продажбата треба да биде завршена до 28 декември, а зделката вклучува опција за откуп.

Во одлуката на управниот одбор на Хјундаи е вклучена и продажбата на затворената фабрика на Џенерал Моторсво Санкт Петербург. Хјундаи ја презеде таа фабрика со годишен капацитет од 100.000 автомобили пред три години, но таа никогаш не беше ставена во функција.