Груевски напиша нова книга, му ја објави издавачката куќа „Ѓурѓа“
Во издание на издавачката куќа „Ѓурѓа“ новата книга на поранешниот премиер и бегалец во Унгарија, Никола Груевски, наскоро ќе се најде во продажба во земјава. Насловот на книгата е „Добро е да се знае“, а Груевски ја најави со објава на социјалните мрежи, објаснувајќи дека се работи за „есеи за значајни историски мигови“.
Тој во книгата се осврнува на периодот од 2017 година до денес, а во неа се поместени „текстови кои се рефлексии на различни настани актуелни и историски“, кои авторот главно ги објавуваше како статуси на Фејсбук.
-Со насловот на книгата „Добро е да се знае“, настојував, особено во ова време на сериозно негирање на македонскиот идентитет, име, јазик, националност и историја, да ги мотивирам, особено оние кои поретко се навраќаат кон тие теми од нашата национална историја, тоа да го прават почесто и да се навраќаат на сопствената национална историја, пишува Груевски.
Поранешниот премиер избега од Македонија пред да оди во затвор по неколкуте активни пресуди против него за злоупотреби додека беше на власт. Тој доби политички азил од власта на Виктор Орбан.