Градската библиотека „Браќа Миладиновци“ – Скопје (ГБСК) продолжува со големата кампања „Читаме современи македонски автори“, во чии рамки книга за февруари е романот „Суво мастило“ од писателот Владимир Илиевски.

По тој повод на 6 февруари, во спомен-собата „Т’га за југ“, се одржа разговор со авторот што го модерираше книжевната критичарка Александра Јуруковска, а фрагменти од делото читаше актерот Андреј Серафимовски.

„Суво мастило“ е роман во кој авторот вешто ја користи историјата како моќна, објективна и вистинита книжевна подлога, а истовремено гради субјективен книжевен однос и перцепција кон таа вистинитост.

– Кога го открив податокот за пронаоѓачот на пенкалото, Едвард Пенкала, прво напишав расказ со него како главен лик, но потоа сфатив дека во неговата биографија има многу нарации и така почнав да истражувам за романот. Читав монографии, енциклопедии, историски книги, сведоштва, истражував мапи на Дрезден, наоѓав две точки во градот и ја премерував далечината помеѓу нив за да откријам дали и за колку време може да се помине со кочија. Потоа го создадов и ликот на Македонецот, најдобриот пријател на Пенкала, кој всушност е целосно измислен – објасни Владимир Илиевски, автор на „Суво мастило“.

Владимир Илиевски (1970, Скопје) е прозаист, поет и книжевен теоретичар. Дипломира и магистрира на Филолошкиот факултет „Блаже Конески“ во Скопје. Романот „Суво мастило“ е издание на „Македоника литера“ и беше финалист за „Роман на годината“ во 2020 година.

(Текстот е објавен во „Културен печат“ број 217, во печатеното издание на весникот „Слободен печат“ на 10-11.02.2024)