Големиот број на пациенти кои секојдневно се обраќаат за лекарски преглед и понатамошен третман во модуларната ковид болница ја прават загрижувачка епидемиолошката состојба во Гевгелија дури и по една година откако беше регистриран првиот случај на заболен пациент од Ковид-19 во општината.

Според директорот на Општата болница, Митко Крџев, енормниот наплив на пациенти доведува до отежнато функционирање на болницата која, покрај ограничениот капацитет, се соочува и со редуциран персонал што ситуацијата ја прави уште понезавидна.

– Последниот биланс во болницата е 26 хоспитализирани во ковид болницата,70 пациенти на третман во дневната болница и 20 пациенти кои се лекуваат во домашни услови со асистенција на Итната медицинска помош и чиј број е со растечка тенденција, рече Крџев.

Како медицинско лице и родител, Крџев испрати искрена порака до младите лица со молба да се придржуваат дисциплинирано на ограничувањата и мерките затоа што смета дека овој трет бран на пандемијата е најсилниот досега и што е уште пострашно веќе ја поместува и долната старосна граница на оние што се инфицираат.

– Не заборавајте дека сите сме одговорни за сопственото и колективното здравје. Заедно ќе бидеме посилни доколку ги почитуваме здравствените препораки. Со тоа ќе ни помогнете нам што побргу и побезболно да се соочиме со третиот корона бран, нагласи Крџев во пораката до младите од општина Гевгелија.