Гастрономско уживање од вештите раце на Бобе Јанкоска: Мафини, меки како памук
Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.
Бобе денеска споделува рецепт за вистински гурмански деликатес – мафини.
– Овие мафини се сунѓерести, меки како памук и многу вкусни. По овој рецепт подготвувам и овошни мафини со сезонско овошје, но овие ги подготвив со домашен џем од јагоди. Рецептов е за подготовка на 24 мафини – порачува Бобе.
Потребни состојки:
– 4 јајца
– 250 грама шеќер
– 300 грама брашно
– прашок за печиво
– ванилин шеќер
– 200 мл јогурт
– 50 мл масло
– 100 грама чоколадни топчиња
– џем од јагоди/ овошје
– шеќер во прав за посипување
Подготовка:
Јајцата, шеќерот и ванилиниот шеќер се матат со миксер додека не станат пенливи. Мешајте додека шеќерот не се раствори и убаво не се измеша. Се додаваат јогуртот и маслото. Намалете ја брзината на миксерот на минимум. Постепено, лажица по лажица, додавајте го просеаното брашно измешано со прашокот за печиво и продолжете да матите уште малку додека смесата не се соедини и грутките не исчезнат. На крај се додаваат чоколадните топчиња (и овошјето).
Во намастени модли за мафини се сипува смесата и се печат петнаесет минути на 220 степени, малку да заруменат.
Се вадат од модлите и се редат во хартиени модли, а кога ќе се изладат, во средина се прави длабнатинка и во неа се полнат со џем. Потоа, мафините се посипуваат со шеќер во прав.
На здравје сладење!