Гастрономско уживање од вештите раце на Бобе Јанкоска: Џем од модри сливи
Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.
Бобе денеска споделува рецепт за вистински гурмански деликатес – џем од модри сливи.
– Палачинка намачкана со овој рустичен џем во рубин боја, надополнет со волшебниот вкус од печени модри сливи ќе ве однесе во друга димензија – порачува Бобе.
Состојки:
– 3 кг модри сливи
– 1 килограм шеќер
– 1 лажица јаболков оцет
Подготовка:
Модрите сливи, исчистени од семки и исечкани на четвртинки, се редат во длабоко тенџере, врз нив се сипува шеќерот и се оставаат 2 часа да отстојат во фрижидер. Потоа се вадат од фрижидер, им се додава лажица јаболков оцет и се става во загреана рерна на 220 степени половина час да почне да крчка, па се намалува температурата на 180 степени и се остава во рерна да се пече додека да згусне, уште час и половина, со повремено мешање.
Кога џемот ќе биде готов, се вади тенџерето, се покрива со влажна крпа и се остава да се излади.
Изладениот џем се полни во тегли.
На здравје!