Бронзените статуи на Мик Џегер и Кит Ричардс, основачите и сѐ уште активни членови на групата „Ролинг стоунс“, беа претставени во нивниот роден град Дартфорд во Англија, пишува „Гардијан“.

Статуите, нарачани од градскиот совет на Дартфорд, ги прикажуваат фронтменот и гитаристот на „Ролинг стоунс“ среде музичка изведба – Мик Џегер со микрофон во раката, а Ричардс со неговата „Фендер телекастер“ гитара.

Бронзените фигури наречени „Блескавите близнаци“ (заедничкиот псевдоним под кој Џегер и Ричардс ги компонираа и продуцираа албумите на „Ролинг стоунс“) ги создаде Ејми Гудман, уметница која и самата признава дека е голема обожавателка на музичката група.

Гудман изјави дека ѝ е чест и привилегија да прикаже вакви „неверојатни музички икони“. Таа истакна дека нејзината цел била да ја долови нивната енергија и хемија.

Таа избрала да ги овековечи своите музички идоли во бронза, онака како што изгледале во осумдесеттите години на минатиот век, а во текот на десетте месеци работа на статуите ја слушала музиката на „Ролинг стоунс“.

„Бев нервозна и под голем притисок бидејќи тие се такви икони“, призна уметницата.

Локалниот општински функционер Џереми Кајт истакна дека „момчињата“ од малиот Дартфорд сега се препознаени и сакани од целиот свет.

„На полето на културата и музиката нема многу повлијателни од „Ролинг стоунс“. Нивната музика го смени лицето на популарната култура и овие момци од Дартфорд сега се двајца од најпрепознатливите и најсаканите луѓе во светот“, рече Кајт.

На откривањето на статуите во центарот на Дартфорд присуствуваа ќерката на Ричардс, Анџела и внуката Ава, а самиот музичар сподели фотографија од статуите со два палци нагоре во знак на одобрување.

Statues of Dartford’s most famous sons, Sir Mick Jagger and Keith Richards, have been unveiled in the high street 🤩 https://t.co/6WYib11jpT pic.twitter.com/ebHNxrVcy0

— KentOnline (@Kent_Online) August 9, 2023

ВИДЕО | Кога ќе те прободи Аморова стрела: Песни инспирирани од голема, вистинска љубов