Ископувањата во северен Ирак доведоа до повторно откривање на скулптура стара околу 2.700 години. Претставата на Ламасу, асирско божество со човечка глава, тело на бик или лав и огромни крилја, е откриена речиси недопрена во близина на Хорсабад, на која ѝ недостасува само главата, а се чува во музеј во Багдад, пренесува „Ашарк Ал-Авсат“. 

„Никогаш во животот не сум ископал нешто толку големо. Вообичаено, Египет или Камбоџа се места каде што се наоѓаат толку големи скулптури“, вели Паскал Бутерлин, француски археолог кој го водел ископувањето и професор по античка блискоисточна археологија на Сорбона.

Како што тој додаде, скулптурата е тешка 18 тони, а димензиите се 3,8 метри на 3,9 метри.

Скулптурата на Ламасу била подигната на влезот од античкиот асирски град Дур-Шарукин, денешен Хорсабад. Изградбата на тој град во 713 п.н.е. ја наредил познатиот асирски крал Саргон II.

На околу 20 километри од Ниневија, изградена е нова палата и нов град, кој имал правоаголен облик и бил со димензии 1.760 на 1.635 метри.

Скулптурата за првпат била спомната од францускиот археолог Виктор Плас, но беше откриена во 1992 година. Главата на скулптурата беше украдена во 1995 година, подоцна пронајдена, а моментално се наоѓа во музејот во Ирак. Во тој период главниот дел од скулптурата била повторно закопан за да биде зачувана во турбулентни времиња и војни.

Скулптурата на Ламасу во Хорсабад која беше закопана, ја преживеа војната со Исламската држава, бидејќи групата уништи делови од градот во 2015 година. Таа уништи антички, неисламски места од културното наследство низ целиот регион, меѓу кои можеби најзначајно во Палмира, Сирија.