Вчера Лондон дишеше во ритамот на модните остварувања, каде и се одржа доделувањето на престижните Британски модни награди. Гламурозната вечер ги „собра“ на куп сите луѓе што значат нешто во светот на модата.

Црвениот килим беше местото каде парот Пријанка Чопра и Ник Џонас продефилираа и буквално го свртеа сето внимание на себе.

Славната актерка која во 2000 година беше прогласена за Мис на светот се појави во раскошна цветна креација од дизајнерот Ричард Квин, која беше магепсувачка и сите погледи беа вперени во неа. Пријанка блескаше во овој шарен комбинезон со цветен принт кој буквално „ја гушкаше“ од глава од петици, а нејзиниот сопруг носеше класичен црн костум со широки панталони и бизарни патики како копито.

Освен Пријанка Чопра, вниманието го привлекоа и многу други ѕвезди кои позираа пред камерите. Дуа Липа воодушеви во својот едноставен црн фустан со невообичаени ракави и минимална шминка.

На црвениот килим воодушеви и блескаво белиот фустан на Адријана Лима, опточен со кристални камчиња, креиран во два дела и висок шлиц.

Посебно изненади и Деми Мур која се појави на доделувањето на наградите во црн светкав фустан со „омбре“ ефект од Fendi и долг вел позади неа.

Впечатлива беше и моделката Вини Харлоу во „јорганест“ фустан со горен дел како топ и додаток невообичаени „пумпасти“ ракавици.

Срцата на присутните беа трогнати кога Идриз Елба, пријател на неодамна починатиот дизајнер Вирџил Абло ја прочита поемата „When Great Trees Fall“ од Маја Ангелу во негова чест.