Во првиот натпревар од групата „Ц“ на Европското првенство во СЦ „Борис Трајковски“ најдобрата македонска машка одбојкарска репрезентација ја совлада Данска со 3:1 во сетови 22:25, 25:22, 25:18, 25:22. Голема и важна победа на Македонија која го прави првиот чекор кон европско осминафинале.

Првиот сет го добија Данците со 22:25, иако нашата селекција неколку пати имаше позитива од два разлика како 6:4, 7:5 и 8:6, а нешто подоцна и од еден разлика (12:11, 13:12), но потоа до крајот на сетот противникот го контролираше резултатот. Стигнуваа ривалите и до највисоки „плус четири“ и само рутински дојдоа до почетна предност во сетови.

Во вториот се воглавно данската репрезентација константно имаше минимално водство, последното на семафорот стоеше (16:17), а потоа кога беше потребно одигравме најдобро во клучните моменти. Одржувавме постепено разлика од два поени (20:18, 22:20), а сетот за израмнување го завршивме со 25:22.

Во третиот сет бевме далеку подобри од противникот, веќе стекнавме четири разлика од 6:2, па имавме и 10:5 за голема радост на трибините. Данците се заканија со доближување резултатски на 10:9, но повторно следуваше наша серија на поени за 15:10, а потоа постепено до крајот на сетот одржувавме шест поени разлика за преземање на позитивата од 2:1 во сетови (25:19).

Од стартот од четвртиот сет контролиравме минимална позитива од еден разлика до 8:6 кога Ѓоргиев се погрижи за „плус два“, брзо се вратија Данците за егал преку Мадсен, но истиот играч згреши при сервис за 9:8 за нашата селекција. И покрај четвртата сервис грешка на Данска, и нашето водство од 14:13 на семафорот, се вратија ривалите со два поени во низа, што го принуди македонскиот селектор Миленкоски да побара тајм-аут.

Со деветтиот поен на Савовски израмнивме на 17:17 во четвртиот сет, но дозволивме Данска да направи два поени во серија, по грешката на Н. Ѓоргиев беа загрижувачки 17:19. Се вративме на 21:21, беше и 22:22, а ерупција на трибините донесе Љафтов за 23:22, по што данската клупа побара минута одмор.

Љафтов блокираше за 24:22 и имавме две меч топки, веднаш првата ја искористивме за конечни 25:22. Наш најефикасен беше Никола Ѓоргиев со 17 поени, а на спротивната страна Мадс Кјед Јенсен запиша 19. По четири блокади имаа Фили Савовски и Александар Љафтов, а три Расмус Микелсонс.

Првото коло од оваа група ќе биде комплетирано в четврток со натпреварите: Црна Гора – Холандија (17.00 часот) и Полска – Чешка (20.00 часот). Вториот меч избраниците на селекторот Јошко Миленкоски ќе го имаат на 2 септември од 20.00 часот против селекцијата на Црна Гора.