На реваншот од втората рунда во Европскиот куп денеска ракометарите на Тиквеш загубија во Австрија од Кремс со 33:25 (17:13).

Македонскиот претставник не успеа да ја одбрани предноста од првиот меч одигран во салата „Јасмин“ во Кавадарци кога славеше со четири голови разлика (33:29).

Австријците уште од самиот старт веќе ја анулираа позитивата на Тиквеш откако поводеа со 6:1. Во следниот период домаќините константно одржуваа предност од пет голови разлика, а во еден имаа и 12:6.

ГРК Тиквеш дојде двапати до „минус три“ негатива (12:9, 13:10), а на паузата Кремс водеше со 17:13.

И наместо да се одржи неизвесноста во овој двомеч, во вториот дел попушти концентрацијата во редовите на Тиквеш, тоа го казни и искористи Кремс кој дојде до огромни 24:15.

Кремс не дозволи Тиквеш да се врати повторно резултатски, домаќинот стекна и „плус 12“ (31:19, 32:20) и тука завршија сите дилеми околу патникот во следната фаза.

За Тиквеш по пет голови имаа Анастасовски, Симиќ и Мајиќ, а на спротивната тсрана Розман запиша осум погодоци.