Поранешниот унгарски европратеник од екстремната десница, Бела Ковач, осомничен за шпионирање за Москва, денеска беше ослободен од обвинението пред првостепениот суд во Будимпешта, но беше прогласен за виновен за проневера на европски пари.

Обвинителството во 2017 година поднесе обвинение против Бела Ковач за „учество во шпионски активности против европски институции во корист на странска држава”, за „затајување данок” и за „фалсификување на документи што довеле до финансиска штета” во периодот од 2012 до 2014 година.

Судството не ја спомена државата во чија корист работел Бела Ковач, но унгарскиот печат пишуваше за неговите бројни патувања во Москва, каде наводно тајно се состанувал со руски дипломати.

Бела Ковач ја напушти националистичката партија Joбик, набргу по појавувањето на тие обвинувања, неговиот пратенички имунитет беше укинат во 2015 година, а од 2019 година тој веќе не е европски пратеник.

Шпионажата во таа држава се казнува со затвор од две до осум години. Ковач беше осуден на една и пол година затвор со условна казна за затајување данок и фалсификување документи, откако потпишал „фиктивни” договори за практика на финансиска штета на Европскиот парламент.