Македонскиот центар ИТИ/Продукција објави две нови е-Драми на современи автори со извонреден талент за драма, дух за перцепција и хумор – Ева Камчевска (Скопје) и Сашо Блажески (Прилеп).

Во драмата „Биолошки часовник“ Ева Камчевска креира апсурдни и надреални драмски пресврти, на сметка на биолошкиот часовник во жената и притисокот под кој таа се наоѓа, секогаш кога одложува да стане мајка. Ева умее да насмее и да релаксира без претенциозност и субверзии, без попување, креирајќи непредвидливи драмски пресврти и јасно дизајнирани драмски ликови. Станува збор за редок и зрел драмски талент во современата македонска драматика.

Драмата „Рокеришта“ на Сашо Блажески зборува за турбо реалноста во релациите и илузиите кај луѓето кои живеат во главниот град и менталитетот на луѓето од провинцијата. Луцидно, перцептивно, вистинито. Маратонски долга драма што сецира менталитети, мисловни матрици, бихевиористички калапи, тела и души продадени на хроничната глупост и други драмски тракатанци на секојдневието.

(Текстот е објавен во „Културен печат“ број 120, во печатеното издание на весникот „Слободен печат“ на 12-13 март 2022)