Најдобрата македонска одбојкарска репрезентација ја темпира формата пред почетокот на јануарските квалификации за пласман на наредното Европско првенство.

Покрај тренинзите, „црвено-жолтите“ играат и пријателски натпревари, на 44 издание на традиционалниот меморијален турнир „Бранко Хаџииљоски – Чајка“ играа двапати против Бугарија.

Во првиот дуел иако имавме водство од 2:0 во сетови и три меч топки во решавачкиот петти сет, на крајот ривалите триумфираа со 3:2 (25:20, 25:22, 20:25, 14:25, 17:19).

Најефикасен во нашата репрезентација беше капитенот Никола Ѓорѓиев со 25 поени (23 од напад и по еден блок и ас), Љафтов заработи 11, Милев 7, а Николов 6. Илиев кој не беше дел од почетниот тим заврши со 4, Ѓорѓи Ѓорѓиев имаше три, а Андонов еден поен.

И денеска во вториот натпревар загуби Македонија, со 3:1. Повторно водевме освојувајќи го првиот сет со 25:17, но наредните три им припаднаа на Бугарите (25:18, 25:22, 25:22). Александар Љафтов заврши со 17, а капитенот Никола Ѓорѓиев со 16 поени кај нас, Владо Милев заработи 7, Ристо Николов 6, Славе Наков, кој почна наместо Иван Андонов, освои три, а техничарот Ѓорѓи Ѓорѓиев еден поен.

Овие две селекции планираат меѓусебе да одиграат уште два меча, на 5 и 6 јануари во Софија.

Турнирот преку кој ќе бараме второ учество на континенталните самити е кај нас, од 11-16 јануари во арената „Борис Трајковски“ против Турција и Босна и Херцеговина.

Ѓорѓиев оптимист за пласман на ЕП: Шансите на Македонија се големи!