Државниот обвинител покрена истрага против претседателката на Перу
Канцеларијата на државниот обвинител на Перу соопшти дека започнала истрага против новата претседателка Дина Болуарте и членовите на нејзиниот кабинет поради насилните судири во кои загинаа најмалку 40 луѓе, а стотици беа повредени од почетокот на декември. Новата влада и покрај ова ја доби довербата од Конгресот со големо мнозинство гласови. Во случај на неуспех, би дошло до реконструкција на владата и оставка на премиерот Алберт Отарола.
Истрагата на државното обвинителство следи по смртта на 17 цивили во јужниот регион Пуно во понеделникот, најсмртоносниот ден на протестите откако минатиот месец беше соборен и приведен поранешниот претседател Педро Кастиљо. Насилството продолжи кога еден полицаец загина откако демонстрантите му го запалија автомобилот.
Државното обвинителство соопшти дека ги истражува Болуарте, Отарола, министерот за одбрана Хорхе Чавез и министерот за внатрешни работи Виктор Рохас, под обвинение за „геноцид, квалификувано убиство и нанесување тешки повреди“.
Групите за човекови права ги обвинуваат властите за употреба на огнено оружје против демонстрантите и фрлање димни бомби од хеликоптери. Армијата, пак, тврди дека демонстрантите користеле и оружје, но и експлозиви од домашно производство.