Во финалето на Европското одбојкарско првенство во женска сениорска конкуренција репрезентацијата на Турција со 3:2 во сетови ја совлада Србија.

Мечот во Брисел, Белгија, донесе многу возбудувања, првиот сет им припадна на Србинките со 27:25.

Следуваше израмнување откако Турчинките во вториот сет беа подобри од 25:21, но возвратија нивните противнички кои ја вратија предноста откако во третиот сет славеа со 25:22.

Турција не се предаваше, најпрвин го доби четвртиот сет со 25:22, а во петтиот решавачки триумфираше со 15:13.

Најефикасна во победничките редови беше Кубанката со турски пасош, Мелиса Варгас со 41 поен, додека на спротивната страна Тијана Бошковиќ се истакна со 37 поени.

За Турција ова е прво злато од европските првенства, додека за Србија ова е трето сребро, претходните два ги освои во 2007 и 2021 година.

Во натпреварот за бронзениот медал селекцијата на Холандија со 3:0 (25:23, 28:26, 25:20) ја надигра Италија.