Во вторник екипата на Вардар 1961 ќе го одигра и вториот натпревар во новата сезона од СЕХА Газпром лигата, а ривал е составот на Војводина.

После стартниот пораз во Скопје од хрватскиот Нексе, скопските „црвено-црни“ ќе се обидат да го запишат првиот триумф во регионалното натпреварување.

Играчите на тренерот Давид Дејвис во меѓувреме славеа во домашното првенство убедливо над Т. Пролет со резултат 34:22.

Вардарци денеска патуваат за Србија каде утре од 17.30 часот, а своите очекувања ги сподели тренерот Дејвис за овој меч.

– После поразот од Нексе, мораме да одиграме подобро против Војводина. Да, бевме подобри против Пролет, но ние треба да продолжиме да работиме, со игра на теренот и очекувам да биде подобро во вторник. Војводина игра дисциплинирано, опасноста доаѓа од Немања Прибак, другите повеќе играат со него, а имаат и добар голман. Војводина кога игра дома е многу опасна. Рано е да се зборува дали имаме напредок во нашата игра, ќе видиме понатаму. Имаше разлика во дуелот со Пролет, ракометарите знаеја што мора да играат и мислам дека ова им влезе во глава. Чекор по чекор мислам дека ќе биде подобро – вели Дејвис.

Ракометарот на Вардар 1961, Дарко Ѓукиќ:

– Пред нас е вториот натпревар во СЕХА лигата. Мислам дека против Војводина нема да ни биде лесно, тие играат на домашен терен, а ние ја вежбаме нашата тактика која мислам дека ќе го покаже своето. Секако, одиме на победа, и мораме да го добиеме овој натпревар. Војводина има генерално ист состав како и минатата сезона, како главни играчи се одвојуваат Прибак и десниот бек Николиќ. Одиме по бодовите, успех ќе биде да го реализираме тоа што сме го зацртале, да загубиме што помалку топки, да играме добра одбрана, и подобар напад за разлика од мечот со Нексе. Тоа се некои наши цели и ќе видиме што од тоа ќе се реализира, но мечот секако дека мораме да го добиеме.