Портпаролот на Централната изборна комисија на Бугарија Димитар Димитров за БНТ ги опиша како скандалозни измените во изборниот законик и гласањето само со апарати.

Како што јави дописникот на МИА од Софија, за Димитров се апсолутно неприфатливи измените на изборниот законик. Во нив, според него, најскандалозна е забраната за гласање со хартиено ливче, односно да се користат само апарати. Според него, такво нешто нема никаде во светот.

Димитров соопшти дека е сигурен оти тоа не е во согласност со бугарскиот Устав. Димитров го повика народниот правобранител да интервенира бидејќи, според него, гласањето со апарати значително го ограничува правото на глас.

Според него, паралелното гласање со хартиени гласачки ливчиња и апарати досега овозможи да се споредат резултатите и да се откријат отстапувања.