Бугарскиот тајкун Врабевски вели дека ни се испрани мозоците, најави 20 бугарски клубови во Македонија
Финансиерот на бугарските клубови во Битола и Охрид, бугарскиот бизнисмен Милен Врабевски, во гостување на Бугарската национална телевизија (БНТ) најави дека ќе се отворат 20 бугарски клубови во земјава.
„За бугарските клубови во Северна Македонија, ме прашувате која е опцијата за решавање на проблемот со насилството. Многу е едноставно, уште 20 клуба и постепено вистината ќе се разбере, а евроинтеграциите значат пред се вистина. Таа ќе ве ослободи“, изјави тој.
Врабевски зборуваше и за „југословенски модел”, кој го посочи како „најлошиот модел на светот“. Според него, на луѓето во Македонија „им се испрани мозоците“, а територијата е „украдена од Бугарија“.
„Една територија украдена со многу крв и престапи, отцепена од Бугарија и асимилирана на еден многу грозен начин, Југословенскиот модел, нема погаден модел на светот. Практично, тој модел се уште е на власт и им ги пере мозоците на луѓето“, рече Врабевски.