Министерството за здравство на Бугарија ги одобри препораките на Стручниот совет за надзор на имунопрофилакса во врска со давање на четврта доза (втора бустер) mRNA вакцина против ковид-19 кај сите лица на возраст над 18 години кои сакаат да се вакцинираат, јавуваат бугарските медиуми.

Втората бустер доза може да се аплицира најмалку 4 месеци по првата засилувачка доза кај лица кои претходно ги примиле и првичните две дози од вакцината пров ковид-19.

Втората бустер доза на mRNA вакцината е многу препорачлива за лица кои спаѓаат во категориите на имунокомпромитирани, пациенти со трансплантации кои примаат имуносупресивна терапија, пациенти на хронична дијализа и пациенти со онкохематолошки заболувања. Исто така им се препорачува на лица кои се корисници и персонал во социјалните институции кои обезбедуваат долготрајна грижа за стари лица, медицински професионалци вклучени во третман на пациенти со ковид-19, стари лица на возраст од 65 и повеќе години.