Москва не е заинтересирана да работи на подобри односи со ЕУ или да се вклучи во конструктивен дијалог за човековите права и политичките слободи. Тоа го нагласи денеска шефот на дипломатијата на ЕУ Жосеп Борел,  кој во својот говор пред Европскиот парламент, по враќањето од Москва, наведе дека земјите-членки на ЕУ ќе одлучат за следните чекори кога станува збор за односите со Русија и дека тој лично ќе стави план на маса, со кој не се исклучуваат санкции.

– Ние сме на крстосница на односите со Русија. Изборите што ќе ги направиме ќе одлучат за динамиката на меѓународните сили од овој век, рече Борел.

Шефот на дипломатијата на ЕУ им порача на членовите на Европскиот парламент дека „Русија не стана модерна демократија, како што се очекуваше” и оти отишол во посета на Москва за „лично да ги процени предизвикувачките односи” што ЕУ ги има со Русија.

– Руските власти одат по загрижувачки пат на авторитаризам. Местото за слобода на изразување и граѓанското општество се стеснува и речиси нема место за развој на демократски алтернативи.

Тој додаде дека неговата посета на Москва и разговорите со рускиот министер за надворешни работи Сергеј Лавров го потврдиле „трендот во кој Русија сака да се оддели од Европа, чиј либерален демократски систем го смета за закана за нејзиниот систем”.

Борел изјави дека министрите за надворешни работи на ЕУ на 22 февруари, како и лидерите на ЕУ во март, ќе разговараат за следните чекори во односите со Русија, што „може да вклучуваат и санкции”.

Извор:МИА