Со свечено дефиле, културно забавна точка од ученици во центарот за изучување на македонскиот фолклор „Митеви” од Скопје, како и тактичко технички збор, Првата механизирана пешадиска бригада која е најголемата борбена единица во армијата, го одбележа денот на единицата.

Началникот на генералштабот, генерал-потполковник Васко Ѓурчиновски честитајќи им го празникот на припадниците на 1.мпбр, истакна дека Генералштабот на армијата целосно е во функција на потребите на бригадата и на сите потчинети команди и единици со цел исполнување на највисоките стандарди на НАТО, каде што, како што рече, веќе де факто сме членка.

Според командантот на бригадата, полковник Драган Ковачки, ова е ден кога треба да се потсетиме на жртвувањата на претходниците на оваа бригада кои придонеле за постигнатото и традициите за бригадата.

-Ние, припадниците на 1. мпбр, својата иднина мора да ја градиме цврсто убедени дека аманетите на нашите претходници и лекциите од минатото мора соодветно да ги вреднуваме, бранејќи ја татковината и почитувајќи ги различностите, затоа што нема почесен позив од војничкиот, нити пак посвета должност од одбраната на сопствениот народ и татковина, истакна полковникот Ковачки.

На свеченоста, по повод денот на единицата, беа доделени повеќе стимулативни мерки за припадниците на бригадата, како и за поранешните команданти на бригадата на кои од страна на началникот на Генералштабот им беа доделени златни значки на армијата за партнерство, координација и соработка, а беше прогласена и најдобра единица во бригадата.

Втори април е одреден за Ден на 1.мпбр, како датум на кој овааа единица е трансформирана согласно последната организациско-формациска армиска структура и превземање на задачите и одговорностите на двете поранешни бригади, со што стана најголемата борбена единица со застапеност од повеќе армиски родови.