Англија закажа два контролни натпревари пред Евро 2024
Фудбалската репрезентација на Англија која беше еден од противниците на Македонија во квалификациите, закажа две пријателски средби пред настапот на Европското првенство во Германија.
Избраниците на селекторот Герет Саутгејт ќе тестираат против селекциите на Босна и Херцеговина и Исланд.
На „Ст. Џејмс Парк“ во Њукасл Англичаните ќе ја пречекаат БиХ на 3 јуни, а четири дена подоцна на „Вембли“ ќе играат против Исланд.
Босанците и Исланѓаните и натаму се во трка за пласман на континенталниот шампионат, следниот месец БиХ ќе игра против Украина, додека Исланд за противник го има Израел.
Потсетување дека Англија на Евро 2024 е во групата „Ц“ заедно со репрезентациите на Словенија, Данска и Србија.