Ал-Келаифи е убеден: Мбапе ќе ја освои „Златната топка“ како играч на ПСЖ
Претседателот на ПСЖ, Насер Ал-Келаифи се надева на продолжување на преговорите за нов договор со Килијан Мбапе кој досега ги одби сите нивни понуди.
– Се надевам дека Килијан ќе ја освои „Златната топка“ како играч на ПСЖ – изјави Ал-Келаифи по вчерашната церемонија на која Лионел Меси по седми пат беше прогласен за фудбалер на годината во изборот на „Франс Фудбал“.
Со овие зборови, Ал-Келаифи ги подгреа надежите на навивачите на ПСЖ дека Килијан Мбапе на кого идното лето му истекува договорот, ќе остане на „Паркот на принцевите“.
– Се надеваме на такво сценарио Килијан е одличен играч, голем човек и знае што треба да прави – додаде првиот човек на ПСЖ.
Изминатото лето, Мбапе би извести челниците на ПСЖ дека сака кариерата да ја продолжи во Реал Мадрид и ги одби сите понуди за нов договор кој му истекува во јуни 2022 година. Но, ПСЖ не му ја исполни неговата желба и ја одби понудата на Реал тешка 180 милиони евра иако се свесни дека наредното лето можат одличниот напаѓач да го загубат бесплатно.
За еден месец, од 1 јануари 2022 година, младиот фудбалер ќе може слободно да преговара со сите заинтересирани екипи, а шпанските медиуми сметаат дека работата е завршена бидејќи Мбапе веќе се договорил со претседателот на „кралевите“ Флорентино Перез и од идната сезона ќе игра на „Сантијаго Бернабеу“.