Златан Ибрахимовиќ и на 40 години покажува дека сè уште е еден од најдобрите напаѓачи на денешницата, прави разлика на натпреварите и со тоа сè уште е во центарот на вниманието.

Но, интересот на јавноста освен со добрите игри, Ибрахимовиќ го привлекува и со своите изјави, а тоа го демонстрира во интервјуто за „Франс фудбал“ во кое зборуваше и за Килијан Мбапе.

Тој смета дека напаѓачот на ПСЖ не работи доволно добро и дека му е потребен некој кој ќе му зборува дека не е доволно добар за да може да напредува.

– Го сакам Мбапе, но не работи доволно. Може да стане толку добар само доколку се дава максимум на секој тренинг. Мора да почувствува крв, да оди по оган и покрај себе да има луѓе кои ќе му зборуваат дека не е доволно добар и дека може да биде уште подобар. Дури тогаш ќе може да надмине некои легенди – вели Ибрахимовиќ.

Напаѓачот потоа зборуваше и за уште еден млад напаѓач, Ерлинг Халанд, и притоа не пропушти да каже нешто во свој стил.

– Мбапе сигурно е меѓу најдобрите на светот. Има уште неколку играчи кои долго време се во врвот, а се уште се млади. Тука е и Халанд, но и Ибрахимовиќ. За останатите не треба да зборуваме. Сакам на сите да им покажам дека се уште можам да го работам тоа што го сакам и дека 40 е само бројка. Не можам да играм како пред пет или десет години, но сега на теренот сум попаметен и поискусен – поентира Златан.