„Жаби“ од Аристофан со стриминг во живо од Античкиот театар во Епидаур

Фото: Принтскрин / Јутјуб

Додека светот сè уште се бори со пандемијата и истражува нови начини за повторно активирање на театарот во ерата на ковид-19, Атинскиот фестивал во Епидаур ја поканува меѓународната публика во најубавиот театар од античкиот свет на директен пренос на ремек-делото од Аристофан насловено „Жаби“ во режија на реномираната режисерка Аргиро Кјоти која ќе го има своето деби во Античкиот театар во Епидаур.

Претставата вклучува екипа на познати грчки театарски актери и оригинална музичка придружба.

По минатогодишниот успешен пренос во живо на претставата „Персијците“ од Националниот театар на Грција, која ја следеа над 100.000 гледачи ширум светот, „Жаби“ ќе може да ја следите во живо на 10 јули во 21:00 часот по атинско време (GMT +3) со поддршка на Министерство за култура и спорт во соработка со „Гугл“ Грција.

Перформансот ќе биде достапен ширум светот (со исклучок на Грција) преку livefromepidaurus.gr и на официјалниот канал на Фестивалот на „Јутјуб“, бесплатно, иако секоја донација е добредојдена.

Претставата ќе биде на грчки јазик со превод на англиски и ќе трае приближно 1 час и 45 минути.

Напишано во 405 година п.н.е., на крајот на Златното доба на Перикле, „Жаби“ е безвременско и едно од најсаканите ремек-дела на Аристофан. Богот Дионис очаен заради состојбата со трагичката уметност во Атина, тргнува во Адот за да го врати поетот Еврипид назад во живите. Тој започнува со потрагата да го врати најдобриот поет на трагедии во светот на живите, во обид да ја врати славата на театарот. Благодарение на оваа претстава, која кулминира со сцената на поетскиот „дуел“ помеѓу Есхил и Еврипид, Аристофан дава остар коментар за банкротираните политички вредности на своето време. Прекрасен скапоцен камен од авторот чие дело останува релевантно засекогаш.

Видео на денот