Збирката поезија „Манифест на каменот“ од Виктор Радун Теон е објавена на македонски јазик
Книгата поезија со наслов „Манифест на каменот“ од Виктор Радун Теон е објавена во издание на Здружението за наука и култура „Нова“ од Битола. Препевот од српски на македонски јазик го направи м-р Мирјана Стојановска. Книгата првично е објавена во Белград, Србија, во 2020 година.
Авторот Виктор Радун Теон работи на Факултетот за применета екологија „Футура“ во Белград. Пишува поезија, проза, есеи и критики. Се занимава со филозофија и студии за иднината. Неговата поезија е преведена на шпански, руски, арапски, романски, македонски, словенечки и на бугарски јазик. Има објавено 11 книги, 67 научни и стручни трудови, педесетина есеи, литературни критики и прегледи, 7 учебници и превел преку 30 книги од англиски на српски јазик.
Книгата „Манифест на каменот“ е шеста книга поезија од Виктор Радун Теон. Книгата содржи вкупно 59 песни, поделени во 6 циклуси: „Јајцето на Еднорогот“, „Вавилонски водопади“, „Чудото на Фениксот“, „Крвта и розата“, „Змијата на Бурата“ и „Манифест на каменот“. „Манифест на каменот“ претставува финална книга во неговата хексалогија.
Сите шест поетски книги чинат едно неразделиво единство, единствен систем, како симбол на Универзумот во сета негова комплексност и циклично движење. Објавувањето на книгата е финансиски поддржано од Министерството за култура на РСМ.
(Текстот е објавен во „Културен печат“ број 200, во печатеното издание на весникот „Слободен печат“ на 14-15.10.2023)