Денеска премиерот Зоран Заев во својот говор од Пелинце, каде тој ја предводеше владината делегација во одбележувањето на 118 години Крушевската Република и 77 години од Првото заседание на АСНОМ, говореше за континуитетот на дефинирањето на македонската држава и за неговото продолжување за градење на вредностите и принципите утврдени на Илинден 1903 и на АСНОМ 1944.

„И, да, народе мој – Третиот Илинден. Третиот Илинден е нашиот континуитет во афирмацијата на вредностите на која е изградена нашата држава и кои светот ги прифати како наша специфика и идентитет според кој Северна Македонија денеска се препознава во светот“ порача денеска премиерот Зоран Заев.

„Третиот Илинден е бесконечноста на нашиот стремеж кон нашата иднина. Затоа нашиот Илинден не е завршен и нема да заврши. Ние го живееме нашиот Илинден.  На нашата и на идните генерации останува да го одржуваме и да го шириме пламенот на Илинден, огнот што го распламтија плејада македонски просветители, учебникари, револуционери, комити и партизани, граматичари и писатели, како и истакнати видни дејци и припадници на другите народи во нашата земја“ истакна Заев.

Тој потенцираше дека Илинден не треба да го оставиме во историјата, туку да го живееме и да го носиме неговиот пламен во иднината, каде што припаѓаме.

„Илинден не е врзан за ниту една идеологија. Ги надминува границите на кој било временски период. Илинден е постојан процес кодиран во духот на Македонците, на Албанците, Ромите, Србите, Турците, Власите, Бошњаците и на сите народи кои живеат, творат и се борат за подобро иднина во нашата татковина, во нашиот дом“ порача премиерот.

„Оваа година одбележуваме три децении од независноста со единствената желба – нека е вековита и да го чуваме и негуваме и тој историски настан како скапоцен дел од нашиот државен континуитет, државниот континуитет како наш трет Илинден“ порача Заев.