Светското население порасна за 75 милиони луѓе во текот на 2023 година и на првиот ден од новата година светот ќе брои повеќе од осум милијарди луѓе, покажуваат податоците објавени од Бирото за попис на САД.

Стапката на раст на светската популација во изминатата година беше нешто под еден процент. Според податоците на Бирото за попис, на почетокот на 2024 година во светот се очекуваат 4,3 раѓања и два смртни случаи секоја секунда.

Стапката на раст во САД во изминатата година беше 0,53 отсто, што е околу половина од светската бројка . САД пораснаа за 1,7 милиони луѓе и ќе имаат 335,8 милиони луѓе на 1 јануари 2024 година.

Ако сегашното темпо продолжи до крајот на деценијата, 2020-тите би можеле да бидат најбавната деценија на раст во историјата на САД , со стапка на раст од помалку од четири проценти во текот на 10-годишниот период од 2020 до 2030 година, рече Вилијам Фреј, демограф. во Институтот Брукингс.

Во моментов, најбавна деценија е онаа по Големата депресија од 1930-тите, кога стапката на раст беше 7,3 проценти.

„Се разбира, растот би можел малку да се забрза кога ќе излеземе од деценијата обележана со пандемијата. Но, сепак би било тешко да се достигне 7,3 отсто “, рече Фреј.

До почетокот на 2024 година, се очекува САД да имаат едно раѓање на секои девет секунди и една смрт на секои 9,5 секунди . Сепак, имиграцијата ќе го спречи намалувањето на населението. Се очекува меѓународната миграција да додаде по едно лице на населението во САД на секои 28,3 секунди. Оваа комбинација на раѓања, смртни случаи и меѓународна миграција ќе ја зголеми популацијата на САД за едно лице на секои 24,2 секунди, пишува АП.