Претседателот на Србија, Александар Вучиќ, денеска истакна дека Србија не е во атлантските интеграции и не сака да влезе во НАТО, но љубоморно ја чува својата воена неутралност, пренесува „Танјуг“.

На посебна седница на српскиот парламент на која се расправа за европскиот план, Вучиќ, одговарајќи на критиките на пратеникот од Двери, Иван Костиќ, посочи дека Србија е на пат кон Европската унија, но дека не е на пат кон Атлантска интеграција.

„Србија е на европскиот пат, а што се однесува до атлантските интеграции, Србија не сака да влезе во НАТО. Србија сака љубоморно да ја чува својата воена неутралност и да ја зајакне. Има разлика меѓу европска и атлантска интеграција“, нагласи претседателот.

Вучиќ во продолжение изјави дека никогаш со никого не преговарал за останување на власт, ниту пак ќе преговара со некого, бидејќи „го интересира само опстанокот и напредокот на Србија“.

„Никогаш нема да преговарам за да останам на власт, ме интересира опстанокот и напредокот на Србија“, рече Вучиќ во продолжението на дискусијата на специјалната седница .