657 монети од 2 евра биле пријавени како фалсификати од страна на банкарски службеници, откако ги провериле сите експозитури во Пеќ. Според полицијата нивната вкупна вредност е 1.314 евра, за кои постои сомнеж дека биле примени порано и дека се фалсификувани. Парите ги заплени косовската полиција, поточно криминално-техничката единица, а истрагата за случајот со фалсификување пари е во тек.

Прометот на лажната монета од 2 евра во Косово достигна големи размери, а граѓаните поднесоа стотици претставки до надлежните институции. Проблемите со монетите се зголемија кога бизнисмените и граѓаните почнаа да не прифаќаат монети од 2 евра. Околу 36.000 монети од 2 евра беа идентификувани како лажни на косовскиот пазар до крајот на октомври, додека пред неколку недели имаше и апсења поради лажни монети. Состојбата се смета за сериозен економски проблем, додека институциите бараат проверка на средствата, пишува Коссев.

Во меѓувреме, претседателот на Бизнис алијанса на Косово, Агим Шахини, побара монетите од 2 евра да се отстранат на одредено време од оптек, бидејќи компаниите немаат специјални уреди за идентификација на лажни монети, објави Економијаонлајн.

„Треба да знаеме дека Косово не е производител на оваа валута, туку увозник. Во последно време имаше неколку случаи, дали тоа беше две евра, дали беше 50 евра или други, но секогаш имаше фалсификувани пари со кои се сакаше да се заработи без да се работи“, рече Шахини и додаде дека „најдобриот начин би бил да се повлече монетата од две евра од Централната банка на одреден временски период, бидејќи нема уред за идентификација што би им овозможил на бизнисмените и граѓаните да препознаат или разликуваат тоа.”