Во најтешко погодениот регион во Италија повторно пораст на бројот на заразени
Речиси половина од смртните случаи се во Ломбардија, каде на крајот на февруари почна епидемијата во Италија.
Голем скок на бројот на потврдени случаи од Ковид-19 во најтешко погодениот регион во Италија, Ломбардија придонесе за најголем дневен пораст на заразени во земјата во последните денови, извести АП.
Според податоците на италијанското Министерство за здравство, во Ломбардија се потврдени 1.033 случаи, што се повеќето во вкупните 1.402 нови случаи во Италија. Во последните неколку дена, дневниот број на случаи во Ломбардија се движеше по неколку стотини.
Вкупно, Италија има 221.216 потврдени случаи на инфекции со коронавирус. Експертите велат дека вистинскиот број е најверојатно многу поголем, истакнувајќи дека многу луѓе со благи симптоми често не се тестираат.
Властите забележале 172 смртни случаи во периодот од 24 часа кој заврши вечерва, што го зголеми бројот на потврдени смртни случаи на 30.911. Речиси половина од смртните случаи се во Ломбардија, каде на крајот на февруари почна епидемијата во Италија.
Здравствените власти со нестрпливо ги очекуваат дневните извештаи од идната недела за да утврдат дали делумното укинување на ограничувањето на движењето на 4. мај предизвика пораст на стапката на заразата.