Многумина ја гледаат дигитализацијата како конечно решение за проблемите во глобалното земјоделство. Компанијата „Континетал“, која веќе неколку години истражува идеи за автономна земјоделска технологија, нарача меѓународна студија за дигитализација со наслов – „Земјоделството во транзиција“. Меѓу другото, студијата доаѓа до заклучок дека, споредено со меѓународните резултати, земјоделците од Германија се добро позиционирани и сосема задоволни кога станува збор за спроведената дигитализација.

Како што пренесува специјализираниот портал „Агрархојте“, Институтот за истражување на пазарот „Инофакт“ во есента 2023 година анкетирал вкупно 503 земјоделски производители од Бразил, Германија, Франција, Јапонија и САД. На учесниците им беа поставени прашања за нивните моментални најголеми предизвици и очекувања за развој на бизнисот, а беа разгледани само фармите со повеќе од 30 хектари. Нема информации за каков вид на земјоделско производство се работи. Резултатите покажуваат дека 79 отсто од сите анкетирани земјоделци во различни земји веќе користат дигитални решенија. Истражувачите не појаснија што точно се подразбира под дигитални решенија, но наведуваат дека 71 отсто од нив рекле дека дигитализацијата игра „прилично голема улога во нивната секојдневна работа во земјоделството“.

На фармите со помалку од 50 хектари, околу 20 отсто од земјоделците изјавиле дека не користат дигитални технологии. На оние со површина од 100 до 200 хектари, 12 отсто од земјоделските производители го дале истиот одговор, додека на фармите со над 200 хектари во нивна сопственост, само 10 отсто не користат дигитална технологија. Експертите на „Инофакт“ заклучија дека колку е помала фармата, толку е помалку дигитализирана. Во Германија дигитализацијата е многу важна за земјоделските производители и тие се меѓу најзадоволните во споредба со другите испитаници, објави Политика.