Американскиот текстописец и музички продуцент Брет Џејмс, познат по своите соработки со најголемите имиња на светската музичка сцена како што се Тејлор Свифт и Кери Андервуд, загина во авионска несреќа во Северна Каролина во четврток. Имаше 57 години, пренесува „Њузвик“.

Џејмс летал во приватен авион што се урна во близина на основното училиште „Јотла Вали“ во Франклин околу 15 часот.

Уште две лица загинаа со него, а ниту еден од учениците или персоналот на училиштето не е повреден. Веста подоцна беше потврдена од Салата на славните на текстописците во Нешвил, во која Џејмс беше примен во 2020 година.

Зад себе ги остава сопругата, Сандра Корнелиус, и нивните четири деца.

Роден во 1968 година во Мисури, Џејмс првично планирал кариера во медицината, но се откажал од колеџ за да продолжи кариера во музиката. Својот прв соло албум го издаде во 1995 година, а шест години подоцна го имаше својот прв број еден со песната на Џесика Ендрус „Who I Am“.

Тој е најпознат по соработката со Кери Андервуд на нејзиниот хит „Jesus, Take The Wheel“ награден со Греми. Тој има напишано над 800 песни за кантри и поп уметници, вклучувајќи ги „Бекстрит Бојс“, „Бон Џови“, Тејлор Свифт и Ник Џонас. Двапати беше прогласен за текстописец на годината на АСЦАП, а беше и продуцент и член на одборите на Здружението за кантри музика и Академијата за снимање.

По веста за неговата смрт, колегите музичари му оддадоа почит со емотивни пораки. Пејачката Сара Еванс напиша: „Потполно сум скршена од загубата на еден од најголемите текстописци со кои некогаш сум работела. Снимив неколку негови песни. Моите молитви се со неговото семејство. Ќе ни недостига.“

Текстописецот Џеси Александар се присети на нивните заеднички настапи и собири: „Секогаш знаеше како да ме насмее и да ме направи да се чувствувам посебно. Music Row никогаш нема да биде ист.“

ASCAP рече дека Џејмс бил „доверлив соработник на најголемите ѕвезди на кантри музиката и вистински застапник на текстописците“, додавајќи дека музичката сцена долго ќе го оплакува.

Федералната администрација за авијација и Националниот одбор за безбедност во сообраќајот започнаа истрага за причината за несреќата. Авионот полетал од Нешвил во 12:41 часот и се урнал кратко пред закажаното слетување.