Влада: Утврден е договор за грант од САД во висина од 8,2 милиони долари
Владата на денешната 68 седница ја разгледа и усвои Информацијата и го прифати усогласениот текст на Договорот за грант за партнерство за развој меѓу Македонија и Соединетите Американски Држави.
Договорот за грант во висина од 8.258.792 американски долари е наменет за зајакнување на економска конкурентност, на проекти за зголемен придонес на младите во општеството, како и за проекти за сузбивање на корупција преку зголемена отчетност на јавниот сектор и со зајакнување на културата на отчетност кај граѓаните.
На оваа седница Владата го утврди текстот на Предлог-законот за изменување на Законот за градежно земјиште.
Со новото предложено решение им се овозможува на компаниите погодени од кризата произлезена од заразната болест КОВИД-19 ослободување од договорните обврски/казни (плаќање пенали) за договорите за отуѓување или давање под долготраен закуп по пат на јавно наддавање и анексите потпишани со единиците на локалната самоуправа заради објективна спреченост да ги реализираат градежните активности.
На 68-та седница Владата го разгледа и прифати усогласениот текст на Меморандумот за разбирање помеѓу Министерството за одбрана на Република Чешка и Министерството за одбрана на Македонија и Министерството за внатрешни работи за техничка соработка за работи поврзани со ремонтот на транспортните хеликоптери со кои располагаат двете министерства и на кои во наредниот период треба да се изврши сервисирање, односно ремонт, се наведува во соопштението од Владата.