Се комплетираше деветтото коло во најсилното италијанско фудбалско првенство со последните два одиграни натпревари во понеделникот.

Удинезе и натаму останува без триумф сезонава во Серија А, ги разочара своите навивачи играјќи само реми против Лече (1:1).

Водеа домаќините со голот на Товин од пенал во 49 минута, но гостите во 83 минута преку Пиколи го избегнаа поразот.

Удинезе е во опасната зона за испаѓање на 18 позиција со шест бодови, додека Лечее на 10 место со 13.

Фиорентина имаше добра серија на резултати во шампионатот, со три победи на последните четири мечеви, но денеска изненадувачки на домашен терен загуби од Емполи со 0:2. Стрелци на головите беа Капуто во 21 и Гјаси во 81 минута на стадионот „Артемио Франки“ во Фиренца.

„Виолетовите“ после вториот пораз се на петтата позиција со 17 бодови, колку што има и Наполи на Елиф Елмас на четвртата позиција, додека Емполи кој го оствари вториот триумф е на 17 место со седум бодови.