ВИДЕО: МЗТ испушти шанса да биде прв во регуларниот дел на АБА 2 лигата
Во големото дерби на 12 коло во АБА 2 лигата се сретнаа МЗТ Скопје Аеродром и водечката екипа во ова натпреварување, Златибор. Кошаркарите на актуелниот македонски шампион имаше и игра и резултат, но сето тоа го „потроши“ во последната четвртина, а загуби во екстра периодот од пет минути (90:85).
МЗТ предводен од Американецот Гилон врза шест поени за почетно водство од 10:4. А за седум минути, Гилон веќе имаше и двојно повеќе реализации. Даде 12 од 18 поени за „сино-белите“ кои поведоа и со 18:12.
Во вториот период, Златибор направи пресврт и дојде до позитива (22:20). Но, само за кратко, затоа што следуваше серија на поени за МЗТ (11:0), која ги донесе до предност од девет поени (31:22). Во тој дел од играта двете екипи погодуваа во серии, а во наредната Златибор се доближи на (33:29). Но, уште еднаш аеродромци влегоа во своја серија, коај ги донесе до двоцифрен плус кој го имаа на полувремето (42:32).
Во третата четвртина играчите на Атанасов имаа и уште поголема позитива. На средината од тој дел од играта, имаа „плус 15“ (54:41). Сепак, во последната влегоа со доста пониски, но сосема солидни (63:54). Период од играта во кој противникот одново имаше „свои минути“. Ги искористи за ново доближување. Со серијата од 7:1, „златиборци“, за кратко време, намалија на 61:64. Дури и поведоа, со 72:66 во последните две минути.
Но, прво Баковиќ, а потоа и Дамјан Стојановски го донесоа МЗТ Скопје во нов егал (72:72), и продолжение од пет минути. Екстра период во кој нашиот шампион остана пократок за пет поени, но и за една голема шанса, да се вклучи дури и во трката за првата позиција на табелата во пресрет на последниот круг од натпреварите во кој ги чека дуел со домаќинот на овој турнир – екипата на Широки.
Вака, по 12 одиграни мечеви, екипата од Аеродром е на ефект 8-4, и ја чека голема неизвесност околу конечниот пласман пред последниот натпревар на турнирот, во недела од 18.00 часот. На овој, статистиката вели дека со 25 поени, но и девет асистенци и пет скока, Гилон беше најдобриот поединец кај скопските „сино-бели“. Делалиќ го заврши мечот со 21 поен и девет скока, а Д. Стојановски и Танасковиќ имаа по 14.