После победите на Аргентина и Уругвај на последните натпревари од групната фаза, ги добивме сите двојки во четвртфиналето на „Копа Америка“.

Аргентинците го освоија првото место во групата благодарение на убедливата победа над Боливија (4:1), со двата гола на Лионел Меси кој запиша јубилеј, откако со 148 настапи стана играчот со најмногу настапи за Аргентина.

Меси ја затресе мрежата на Боливија во 33 и 42 минута, претходно Гомез после асистенцијата на Меси во шестата минута ја започна гол-серијата, додека конечниот резултат го постави Лаутаро Мартинез во 65 минута – само пет минути откако Саведра намали на 3:1 .

Уругвај стигна до второто место во групата благодарение на голот на Единсон Кавани против Парагвај во директна пресметка. Имено, играчот на Манчестер јунајтед ја затресе мрежата од белата точка во 21 минута за конечни 1:0.

Аргентинската селекција во четвртфиналето ќе игра против Еквадор, Уругвајците ќе ги одмерат силите со Колумбија, потоа Парагвај ќе се соочи против Перу, додека Бразил ќе бара полуфинале преку Чиле.