ВИДЕО I Бајден: Путин е убиец и наскоро ќе плати за мешањето во американските избори
Американскиот претседател Џо Бајден порача дека неговиот руски колега Владимир Путин наскоро ќе почувствува последици за директното мешање во ланските избори во САД за исходот од нив да биде во корист на Доналд Трамп.
– Ќе плати цена, а наскоро ќе види какви ќе бидат последиците, истакна Бајден во разговор за АБЦ Њуз.
Ваквиот неговиот однос доаѓа по извештаите на разузнавачките служби во кои се поткрепуваат обвиненија дека зад руското мешање во американските избори стои лично Путин. Русите возвраќаат дека таквите обвинувања се неосновани.
Бајден за Путин рече дека релативно добро го познава и дека, според негово искуство со странски челници, најважно е да го познавате соговорникот. Исто така, рече дека „Путин нема душа“ и потврдно одговори на прашање „дали смета дека претседателот на Русија е убиец“.
– Да, го мислам тоа, кусо одговори Бајден.
Тој нагласи дека, истовремено, постојат прашања од заеднички интерес за кои може да се соработува што како пример го наведе неодамнешното продолжување на нуклеарниот договор СТАРТ.