Фасцинантна снимка од големо јато фламинга кое лета над Охридското Езеро кај Поградец, сподели албанскиот премиер Еди Рама на социјалните мрежи. Прекрасните розови птици полетуваат во близина на брегот, а дрон-камерата ги следи, покажувајќи ја нивната грациозност.

Фламингата традиционално се ретки гости во Македонија, но последните години сè почесто се појавуваат во месеците кога трае нивната миграција кон јужните предели во кои презимуваат. Големите фламинга (Феникоптерус розеус) најчесто ја минуваат зимата во топлите предели на Медитеранот и Северна Африка – во јужните делови на Грција, Турција, Тунис, Алжир и Египет, како и во делови од Блискиот Исток.