Големите скопски ривали МЗТ Скопје и Работнички ќе играат меѓу себе во утрешното полуфинале (20.15 ч.) од кошаркарскиот куп на Македонија кој се игра во Гевгелија.

Работнички рутински го совлада Куманово со 104:80, а својата сила и решеност да дојде до јубилејниот 10. трофеј во Купот на Македонија,  ја демонстрира уште во првата четвртина која ја реши во своја корист со 31:16. Бојан Крстевски со 24 постигнати поени  беше најпрецизен насредбата, додека Бобан Стајиќ додаде 20 поени.

И МЗТ Скопје немаше никакви проблеми со Кожув победувајќи со 89:62. Одличната форма кошаркарите на МЗТ Скопје ја демонстрираа уште од првата минута, поведоа со дури 18:0, а п противникот првите поени ги постигна во дури петтата минута. Дамјан Стојановски со 15 поени и Љубомир Младеновски и Предраг Самарџиски со по 10 поени беа најзабележителни во победничкиот тим.

Прв полуфиналист е домаќинот Блокотехна која фуриозно го стартуваше завршниот турнир. Декласиран е тимот на АВ Охрид со 115:68. Божо Ѓумиќ со 21 поен беше најдобар кај Блокотехна, додека новите засилувања Павле Михајловски и Кенет Фанденбург постигнаа 19 односно 15 поени.
Нивен ривал е победникот од последната четвртфинална средба помеѓу Гостивар и Фени Индустри која се игра во моментов.