Ултра кремаст: Рецепт за свиленкаст чоколаден крем без јајца и брашно
За да направите неверојатен свиленкаст чоколаден крем кој се топи во устата, можете да искористите готвачки трик и да подготвите намелака – што во превод од јапонски значи „ултра кремаста“. Слично на ганаш, но и на мус, за овој крем нема да ви требаат јајца, ниту брашно.
Намелака може да се користи за полнење на слатки, колачи и пандишпан, како и за украсување десерти. Исто така, со овошје и шлаг или додатоци како пудинг или бисквити, намелаката лесно се трансформира во независен десерт.
Состојки:
• 200 г квалитетно темно чоколадо (70 проценти какао)
• 180 мл полномасно млеко
• 30 г гликозен сируп или мед
• 4 г желатин во прав
• 360 мл крем со најмалку 30 проценти маснотии (крем за шлаг)
Подготовка:
1. Чоколадото ставете го во сад со средна големина отпорен на топлина. Чоколадото ситно исецкајте го.
2. Истурете го млекото и сирупот од гликоза или медот во мало тенџере на тивок оган и оставете да зоврие.
3. Додека млекото се загрева, во шолја ставете го желатинот во прав. Додадете една лажица многу ладна вода и добро измешајте. Оставете неколку минути или додека не се стврдне во густа смеса.
4. Кога млекото ќе почне да врие, тргнете го од оган и измешајте го желатинот, мешајте додека целосно не се раствори.
5. Со топлата млечна смеса прелијте го чоколадото и оставете неколку минути да се стопи чоколадото. Со помош на шпатула отпорна на топлина, нежно измешајте ја смесата со кружни движења за да се соединат млекото и чоколадата додека не се изедначи. Ако млекото не е доволно жешко, некои од парчињата чоколада може да не се стопат. Во овој случај, можете да ги стопите на пареа, или на неколку секунди во микробранова печка, но внимавајте да не изгори чоколадото.
6. Истурете го кремот и мешајте со шпатула со мали кружни движења додека целосно не се соедини. Истурете го кремот во мал сад и покријте го со пластична фолија за да ја допре површината. Оставете го во фрижидер најмалку 8 до 10 часа (по можност преку ноќ) пред употреба. Откако ќе се стегне, префрлете го преливот во кеса или употребете го директно по желба.
