Три жени од кои две од Африка, влегоа во вториот круг за избор на генерален директор на Светската трговска организација (СТО) на местото на Бразилецот, Роберт Азеведа кој се повлече од функцијата на почеток од август, една година пред истекот на мандатот.

Организацијата со седиште во Женева постои 25 години и никогаш досега немала жена од Африка на раководна функција.

Петте кандидати се кениската министерка Амина Мохамед, поранешната министерка за финансии на Нигерија, Нгози Окоњо-Ивеал, поранешната јужнокорејска министерка за трговија, Јо Мјунг-хе, Мухамед ал Туваиџри од Саудиска Арбија и поранешниот британски министер Лијам Фокс.

Вториот круг на гласање за директор на СТО ќе се одржи од 24 септември до 6 октомври, а конечната одлука за новиот генерален директор на организацијата треба да биде позната на почетокот на ноември.

Изборот на нов шеф на СТО воообичаено трае девет месеци, но процесот сега е сведен на три месеци. Новиот генерален директор, според непишано правило, се избира со консензус, а гласањето се користи само како крајно средство.

Наследникот на Азеведа ќе се соочи со предизвиците – реформирање на СТО, преговори во момент на растечки протекционизам, длабока рецесија предизвикана од пандемијата со Ковид-19 и трговски тензии, пред сè, меѓу САД и Кина.