Тригодишно девојче нашло полн пиштол во домот во Тексас и случајно ја застрелало својата четиригодишна сестра. Девојчето починало, пренесува „Си-Би-Ес“.

Шерифот на округот Харис Ед Гонзалес изјави дека инцидентот се случил синоќа околу 20 часот по локално време и дека девојчињата биле во спалната соба во станот во Хјустон каде што живееле со своите родители. Со нив во домаќинството живееле и други членови на семејството.

Девојчињата биле во спалната соба без родителски надзор кога 3-годишното девојче пронашло наполнет полуавтоматски пиштол и испукало еден куршум кон нејзината сестра, рекол шерифот.

Откако го слушнале истрелот, родителите се упатиле кон спалната соба и го нашле четиригодишното девојче на подот. Девојчето починало на лице место. По инцидентот семејството веднаш повикало полиција и брза помош.

Окружното обвинителство на округот Харис по истрагата ќе одлучи дали некој од родителите или другите членови на семејството ќе се соочат со обвиненија. Истрагата се уште е во прелиминарна фаза, рече шерифот.

„Кога детето ќе го загуби животот на овој начин, заедницата е засегната. Оваа трагедија е една од многуте што можеше да се избегне. Продолжуваме да испраќаме порака дека ова може да се спречи.

Мора да бидете одговорен сопственик на пиштол и мора да го чувате на безбедно место. Тоа е повеќе од кажување на малите деца да не допираат пиштоли. Има премногу вакви трагедии“, рекол шерифот Гонзалес.