Српската пејачка Анѓела Иѓнатовиќ (22), позната како Бресквица, е една од 28-те натпреварувачи на годинашното издание на фестивалот „Песна за Евровизија“, каде што ќе биде избран претставникот на Србија на следното издание на Евровизија.

Иако нејзината песна „Гнездо орлово“ („Орелско гнездо“) е една од најслушаните на платформата Јутјуб, Бресквица доби и голем број негативни коментари за текстот на песната. Имено, многумина сметаат дека 22-годишната пејачка пее за „враќање на територијата на Косово кон Србија“.

Проблематичната строфа гласи:

Сив облак го покри небото, повторно има црни птици,
Грми, дува, паѓа град и го руши орелското гнездо,
Таткото му вели на малиот орел: „Сине, ќе биде готово“,
Ќе си заминат црните птици, повторно ќе биде ведро

„Последната реченица, според мене, целосно ја објаснува намерата на песната. Тоа значи дека Албанците ќе ‘исчезнат’ од Косово и дека Србите ќе имаат целосна контрола врз територијата. Тоа значи легитимирање на масакрот и етничкото чистење на Албанците во Косово“, напиша еден од твитерџиите.

Dad says to the little eagle, “it will be over, son”⁰The black birds will go away, it will be sunny again

The sun is a symbol of serbian hegemony in Kosovo. While the darkness is a symbol of the actions taken by NATO to liberate Kosovo from serbian paramilitaries.

— Vin?? (@redbullsvviings) January 25, 2024

„Бресквица има геноцидна песна“, „Евтино собирање гласови“, „И да победи, Евровизија нема да дозволи ваква песна“, „Страв и ужас“, се дел од коментарите.

Друг корисник на Твитер објави дека летната резиденција на Хитлер се вика „Орелско гнездо“ и дека тоа ја прави песната проблематична.

Младата пејачка не се огласи во врска со овие наводи. Пред неколку дена таа на Инстаграм напиша: „Сакајте се, почитувајте ги другите, бидете луѓе. Бидете горди на земјата од која доаѓате и обидете се да им ја претставите на сите како што треба“.