Најголемата поп-ѕвезда на денешницата Тејлор Свифт е казнета со 3.010 долари поради фрлање ѓубре пред нејзиниот дом во Њујорк, пишува „Њујорк пост“.

Според странските медиуми, таа добила 32 казни затоа што не го одржувала чист просторот пред нејзиниот стан. Казните ги добила во периодот од јануари 2018 до јануари 2023 година, „Њујорк пост“ стигнал до нив и потоа ги објавил.

Санитарните инспектори ја казниле Свифт бидејќи просторот пред нејзиниот дом бил неуреден, тротоарот бил валкан и таа неправилно го складирала ѓубрето. Тие пишуваат дека тротоарот бил полн со весници, шишиња, картони и салфети, содржина од пепелници и отпушоци.

Пејачката се жалела за казните, по што од вкупната сума ѝ одзеле 200 долари. Но, нејзините соседи не биле задоволни од тоа како Тејлор го одржува тротоарот пред нејзиното живеалиште.

„Таа не се грижи за ѓубрето. Таа е повеќе фокусирана на нејзината мултимилионска турнеја која ги банкротира нејзините обожаватели“, изјавил за „Њујорк пост“ еден 22-годишен шетач на кучиња.

Дејвид Алдеа, поранешниот станодавец на пентахаусот пејачката, имал само пофални зборови за Тејлор.

“Таа беше совршена станарка целото време и беше одлично со неа. Немам ништо друго освен позитивни работи да кажам за неа”, изјавил тој.

Некои дури и ги обвинуваат фановите кои чекаат пред куќата на Тејлор, дека тие се всушност оние што го оставаат ѓубрето.

Инаку, ова не е единствениот имот што го поседува Тејлор Свифт. Таа има уште неколку станови и куќи во Њујорк, Беверли Хилс, Род Ајленд и Нешвил.