Суеверие или традиција: Зошто новата година ја започнуваме со бакнеж?
Одбројување, па бакнеж до драгата личност до вас и на крај – новогодишна честитка до сите присутни. Ова е познатото сценарио на почетокот на новата година. Но, како започнала оваа традиција?
Можеме да ја парафразираме познатата изрека и да кажеме дека сите обичаи водат кон Рим. Ова е точно барем што се однесува до денешните обичаи за зимските празници во западниот свет, кои влечат корени од римската Сатурналија. Овој пагански фестивал се одржувал помеѓу 17 и 23 декември, како знак на обожавање на Сатурн и одбележување на зимската краткоденица, пишува „Пут куфер“.
Богот на земјоделството бил почестен со украсување на домот со зеленило, давање подароци на најблиските, поминување време со пријателите и семејството и со богати гозби кои вклучувале вино, па луѓето биле доста пијани. Во таква состојба, бакнежот е логично продолжение на забавата, иако самиот чин на бакнување не бил официјален обичај на Сатурналија.
Средновековниот викиншки фестивал Хогманај е стариот шкотски еквивалент на новогодишната прослава, каде покрај дружењето, танцувањето и пеењето, вообичаено било да се разменуваат бакнежи со најубави желби за новата година. Тие бакнежи не биле нужно од романтична природа – сите присутни се бакнувале. Овој обичај постои и ден-денес во Шкотска, каде што е сосема нормално да се бакнете со сите на полноќ.
Овој обичај се проширил и на други места во Европа, а подоцна го преминал Атлантикот и пристигнал во САД. Германските имигранти биле одговорни за ширењето, како што објави „Њујорк тајмс“ на 3 јануари 1863 година, со забелешка дека „срдечните бакнежи се разменуваа околу полноќ“. Во САД, Германците важеле за „подобри” имигранти од другите Европејци – доселеници, затоа нивните обичаи полесно се прифаќале и ширеле.
Новогодишниот бакнеж не е само моментална наклонетост, туку има и суеверно значење: додека часовникот отчукува пред почетокот на новата година, треба да бакнете некого ако не сакате да ја поминете целата година сами. Денес, полноќниот бакнеж е една од најраспространетите новогодишни традиции или, подобро кажано, суеверија.